NAGLATAG ng malinaw na paalala ang bagong ulat mula sa isang kilalang international think tank na sa gitna ng agresibong ambisyon ng Tsina, ang Pilipinas ay hindi lang nagtatanggol ng teritoryo — nagtatanggol tayo ng prinsipyo.

Ipinakita sa ulat na ang posisyon ng bansa sa West Philippine Sea ay higit pa sa territorial claim. Ito ay mahalagang ambag sa pagpapanatili ng pandaigdigang kaayusan at paggalang sa batas.

Ayon kay Chairman Emeritus Dr. Jose Antonio Goitia, ang tindig ng Pilipinas “ay dapat nakabatay sa batas, katotohanan, at dangal ng sambayanang Pilipino — hindi sa takot.”

Binibigyang-diin ng think tank na habang lumalawak ang kilos ng Tsina lampas sa sarili nitong rehiyon, nagiging mahalagang pambalanse ang Pilipinas. Sa patuloy na pag-giit ng bansa sa 2016 Arbitral Ruling at sa hindi pag-atras sa harap ng presyur ng Beijing, mas tumitibay ang kaayusan sa Asya.

“Kapag ang isang bayan ay naninindigan sa tama, naririnig ito kahit sa malalayong lugar,” sabi ni Goitia.

Hindi kailanman gumamit ng dahas ang Pilipinas para igiit ang tama. May malinaw na desisyon ang isang pandaigdigang hukuman, at hindi iyon mabubura ng banta o panggigipit.

“Hindi sa lakas ng sigaw nasusukat ang tibay ng bansa. Sa paninindigan ito nakikita,” dagdag ni Goitia.

Itinuro rin sa ulat na may mahalagang posisyon ang Pilipinas sa rehiyonal at pandaigdigang seguridad dahil nakapwesto ito sa kritikal na ruta ng kalakalan. Kaya ang bawat hakbang ng bansa ay may epekto hindi lang sa Southeast Asia kundi pati sa mas malawak na mundo.

“Hindi natin hiniling ang papel na ito, ngunit hindi rin natin ito tatalikuran,” aniya. “Ang pagtatanggol sa ating karagatan ay paggalang sa mga ninunong nagbuwis ng buhay para sa ating bansa.”

Ayon pa sa ulat, mahinahon ngunit matatag ang Pilipinas. Hindi tayo naghahasik ng tensyon; iginigiit lamang natin ang tama at patas na proseso. Ang tunay na gulo, anila, ay nagmumula sa mga bansang gumagamit ng lakas habang binabalewala ang batas na kinikilala ng buong mundo.

“Kapag malinaw ang katotohanan, ang pagiging matatag ay tapang. At ang tapang ay nagdadala ng respeto,” paalala ni Goitia.

Giit pa niya, tungkulin ng lahat ng bansa na ipagtanggol ang kaayusang nakabatay sa batas dahil dito nagmumula ang kapayapaan. “Ang pagsuporta sa Pilipinas ay hindi pakikipag-away. Ito ay pagtindig para sa mundong may batas at dangal.”

At kahit ipagpilitan pa ng Tsina ang kanilang pag-angkin, naninindigan ang Pilipinas — mahinahon, makatarungan, at matibay.

“Para ito sa mga batang Pilipinong darating pa. Maaaring lumakas ang mga alon, pero ang tapang ng Filipino ay hindi lumulubog,” pagtatapos ni Goitia.

Si Dr. Jose Antonio Goitia ay Chairman Emeritus ng apat na civic-oriented organizations: Alyansa ng Bantay sa Kapayapaan at Demokrasya (ABKD), People’s Alliance for Democracy and Reforms (PADER), Liga Independencia Pilipinas (LIPI), at Filipinos Do Not Yield (FDNY) Movement.